Ombygging av tidlegare Ulstein skule til Skeide barnehage

Ombygging til ny barnehage

Ulstein kommune er i gang med å bygge om den tidlegare Ulstein skule til Skeide barnehage. Målet er å etablere ein framtidsretta barnehage med kapasitet til om lag 120 born. I den tidlege fasen er det utarbeidd planar for både innvendige løysingar og uteområde, i tett samarbeid med barnehagestyrarar og tilsette for å sikre gode og funksjonelle løysingar for brukarar og tilsette.

Fokus på gjenbruk og miljø

Prosjektet legg stor vekt på gjenbruk og miljø. Utstyr og inventar frå den tidlegare skulen blir flytta til andre skular i kommunen eller attbrukast i barnehagedrifta, noko som både sparer kostnader og gir miljømessige gevinstar. Også leikeapparat blir vurdert for vidare bruk, samtidig som drift, vedlikehald og reinhaldspersonell er involvert i prosessen for å sikre gode og praktiske løysingar.

Forprosjekt med tekniske avklaringar

Prosjektet er no inne i forprosjektfasen, med fokus på byggtekniske avklaringar både innvendig og utvendig. Kommunen nyttar fagmiljø frå eksisterande rammeavtalar innan bygg, elektro og entreprenørtenester for å finne kostnadseffektive og praktiske løysingar. Nabovarsel vil snart bli sendt ut som ein del av vidare byggesak, og det føregår arbeid med detaljprosjektering, byggesøknad, avklaringar med Arbeidstilsynet og prisgrunnlag før gjennomføringsfasen startar.